Tuesday, November 27, 2018

ಎಂಟನೇ ಆಯಾಮ ಅಧ್ಯಾಯ ಮೂರು .ಮುತ್ತಿಗೆ ಹಾಕಿದ ಮುತ್ತಿನ ಕನಸು

"ಅಮ್ಮಾ..."
"ಏನೇ...ರಚನಾ "
"ನಿನ್ನ  ಏನೋ ಕೇಳಬೇಕಿತ್ತು"
"ಕೇಳು"
"ಅದು... ನಂಗೆ ಕೆಲವೊಂದು ದಿನದಿಂದ ಒಂದೇ ಥರ ಕನಸು ಬರ್ತಿದೆ"
"ಏನು ಕನಸು?"
"ಅದು... ನಮ್ಮ ಮನೆ ಮೇಲಿರೋ ಹುಡುಗ ಒಬ್ಬ ನಿಮ್ಮ ತಂದೆ ಬಗ್ಗೆ ಏನೋ ಸತ್ಯ ಹೇಳ್ತೀನಿ ಅನ್ನೋ ಥರ .. ಆದರೆ ... ಏನು ಅಂತ ಕೇಳೋ ಅಷ್ಟ್ರಲ್ಲಿ ಕನಸಿಂದ ಎದ್ದಿರ್ತೇನೆ. ಸುಮಾರು ತಿಂಗಳಿಂದ ಹೀಗೇ ಕನಸು ಬೀಳ್ತಿದೆ"
"ರಾತ್ರಿ ಬೇಗ ಮಲಗು ಅಂತ ಹೇಳಿದ್ರೆ ನೀನು ಕೇಳಲ್ಲ. ಹಾಳು ಮೊಬೈಲ್ ನೋಡ್ತಾ ಇರ್ತೀಯ . ಬೇಗ ಮಲಗಿದ್ರೆ ಎಲ್ಲಾ ಸರಿ ಹೋಗುತ್ತೆ. ಕಣ್ತುಂಬ ನಿದ್ರೆ ಬರುತ್ತೆ . ಈ ಅರೆ ಬರೆ ನಿದ್ದೇನಲ್ಲೇ ಹೀಗೆಲ್ಲಾ ಆಗೋದು.." 
ಅಮ್ಮ ಅಡಿಗೆ ಮನೆಗೆ ಹೋದ ತಕ್ಷಣವೇ ಸುನಯನ ಎಂಬ ಅಕ್ಷರಗಳು ಆಕೆಯನ್ನ ಹಿಂಬಾಲಿಸಿದವು.
ರಚನಾ ಳ ಕಣ್ಣುಗಳು ದೊಡ್ಡದಾದವು... ಮೂಲೆಯಲ್ಲಿ ಎಲ್ಲವನ್ನೂ ಗಮನಿಸುತ್ತಿದ್ದ ಇವನತ್ತ ನಡೆದಳು
ಅವನನ್ನ ತಬ್ಬಿಕೊಳ್ಳುತ್ತಾ
"ಇನ್ನೂ ಎಷ್ಟು ದಿನ ಬೇಕು ನೀನು ಬರೋಕೆ? ಬೇಗ ಬಾ ಸಮಯ ಕಳೆದುಹೋಗಿ ಕತ್ತಲು ಮುಸುಕುವ ಮುಂಚೆ"
ಹಿತವಾದ ಮುತ್ತನ್ನ ಅವನ ಕೆನ್ನೆಗೆ ಕೊಡುತ್ತಿದ್ದಂತೆ....
ರಾಮ್ ತುಟಿ ಅರಳಿ ಅವಳನ್ನ ಮತ್ತಷ್ಟು ಬಾಚಿ ತಬ್ಬಿ ಪಿಸುಗಟ್ಟಿದ
"ಆದಷ್ಟು ಬೇಗ"
........
ರಾಮ್ ದಿಢೀರ್ ಎಂದು ಎದ್ದು ಕೂತ..

ಏನಿದು ಕನಸು...
ಮುತ್ತು ಕನಸಲ್ಲಿ ಕೊಟ್ಟದ್ದಾದರೂ ಯಾಕೆ ಇಷ್ಟು ಖುಷಿ ಆಗುತ್ತಿದೆ..
ಯಾರಾಕೆ?
ಮೊಬೈಲ್  ಆನ್ ಮಾಡಿ ತನ್ನ ನೋಟ್ಸ್ ನತ್ತ ಕಣ್ಣು ಹಾಯಿಸಿದ..
ದಿನಾ ಬೀಳುವ ಕನಸುಗಳನ್ನ ದಾಖಲಿಸಲಾರಂಭಿಸಿ  ಎರೆಡು ತಿಂಗಳುಗಳಾಗಿದ್ದವು.
ಇಲ್ಲಿಯವರೆಗೆ ಇಪ್ಪತ್ತಕ್ಕಿಂತ ಹೆಚ್ಚು ಬಾರಿ ಬಿದ್ದ ಕನಸುಗಳಲ್ಲಿ ರಚನಾ ಎನ್ನುವ ಹುಡುಗಿ , ಆಕೆಯ ತಂದೆಯ ಬಗ್ಗೆ ಯಾವದೋ ಸತ್ಯವನ್ನ ಹುಡುಕುವದಷ್ಟೇ ಆಗಿತ್ತು.
ಇಂದು ಮೊದಲ ಬಾರಿ ಆ ಕನಸಲ್ಲಿ ರಾಮ್ ಸಹಾ ಪಾತ್ರಧಾರಿಯಾಗಿದ್ದ... ಅಷ್ಟೇ ಅಲ್ಲ ಇನ್ನೂ ಇಪ್ಪತ್ತೂ ತುಂಬದ  ಅವನಿಗೆ ಪ್ರೇಮದ ಅಪ್ಪುಗೆ ಮತ್ತು ಮುತ್ತಿನ  ಮೊದಲ ಅನುಭವ ಕೂಡ...

ಕನಸಲ್ಲಿ ಬಂದು ಆಹ್ವಾನ ಕೊಡುತ್ತಿರುವ ಈ ರಚನಾ ಯಾರು ? ಎಲ್ಲಿದ್ದಾಳೆ? ತನಗೂ ಅವಳಿಗೂ ಏನ ಸಂಬಂಧ ? ಬೇಗ ಬಾ ಎಂದೇಕೆ ಕರೆಯುತ್ತಿದ್ದಾಳೆ . ಕತ್ತಲು ಮುಸುಕುವ ಮುಂಚೆ ಅಂದರೆ? ಈ ದಿನವೇಕೆ?  ಅಥವ ಮತ್ತು ಯಾವಾಗ?...
ಎಫ್ ಬಿ  ಓಪನ್ ಮಾಡಿ ರಚನಾ ಎನ್ನುವ ಹೆಸರುಗಳನ್ನ ಹುಡುಕಲಾರಂಭಿಸಿದ..
ಆಕೆ ಕನ್ನಡದವಳು ಮತ್ತು ಬೆಂಗಳೂರಿನವಳು    ಅನ್ನುವಷ್ಷು ಮಾತ್ರ ಕನಸಲ್ಲಿ ತೋಚಿದ್ದು...

ಆದರೆ ಕನಸಿನ ಮುಖ್ಯ ಅಂಶವನ್ನೇ ಮರೆತಿದ್ದ
..................

"ಲೋ ಹುಚ್ಚ ಕನಸಲ್ಲಿ ಕಂಡವಳನ್ನ ಫೇಸ್ಬುಕ್ ಇಂಟರ್ನೆಟ್ ನಲ್ಲಿ ಹುಡಕ್ತಾರಾ.. ಸೈಕಾಲಜಿ ತಗೊಂಡು ಓದ್ತಾ ಇದೀಯ, ಕನಸಿನ ಬಗ್ಗೆ ಇಷ್ಟೆಲ್ಲಾ ಗೊತ್ತಿದ್ದೂ ಹಿಂಗೆಲ್ಲಾ  ಮೂಢನ ಥರಹ  "
 ಕಾಲೇಜಿನಲ್ಲಿ ರಾಮ್ ಹೇಳಿದ್ದು ಕೇಳಿ ಚರಣ್ ನಗಲಾರಂಭಿಸಿದ್ದ
"ನಮ್ಮ ಸುಪ್ತ ಮನಸು ನಾವು ನೋಡಿರೋ ಕೇಳಿರೋ ಓದಿರೋ ಎಲ್ಲಾ ವಿಷಯಗಳನ್ನ ತನ್ನದೇ ಆದ ರೀತಿಲಿ ಅರ್ಥೈಸಿಕೊಂಡು ಅರೆ ನಿದ್ರಾವಸ್ತೆ ಅಂದರೆ ತೀಟಾ ಹಂತದಲ್ಲಿ ಕನಸುಗಳನ್ನ ಚಿತ್ರಿಸತೊಡಗತ್ತೆ.ಕಥೆಗೂ ನಿನಗೂ ಯಾವುದೇ ಸಂಬಂಧ ಇಲ್ಲದೇ ಇರಬಹುದು ಆದರೆ ಆ ಕನಸು ನಿನ್ನ ಮನಸಿಂದಾನೇ ಬಂದಿರುತ್ತೆ  . ಆ ಹುಡುಗೀನ ನೀನು ಎಲ್ಲೋ ನೋಡಿರ್ತಿಯ.. ಅಷ್ಟೆ ಆಕಾಶದ ಅಪ್ಸರೆ ಅಂತೂ ಖಂಡಿತಾ ಇರ್ಲಿಕ್ಕಿಲ್ಲ...'
ತನಗಿಂತ ಕಡಿಮೆ ಮಾರ್ಕ್ಸ್ ತಗೊಂಡು ತನಗೇ ಕನಸಿನ ಬಗ್ಗೆ ಉಪದೇಶ ಕೊಡುತ್ತಿದ್ದ ಚರಣ್ಗೆ  ಬಾರಿಸಿದ

"ಲೋ ಅಣ್ಣಾ ನಿಂಗೆ ಲೆಕ್ಚರಿಂಗ್ ಕೊಡೋಕೆ ಬರುತ್ತೆ ಅಂತ ಗೊತ್ತು. ಆದರೆ ನಂಗಿವಾಗ ಅದು ಯೂಸ್ ಆಗಲ್ಲ. ನೀನು ಹೇಳಿದ ಎಲ್ಲಾ ವಿಷಯಾನೂ ರಾತ್ರಿ ಇಂದ ಯೋಚಿಸ್ತಾ ಇದೀನಿ.... ಆದರೆ ಆ ಹುಡುಗಿನ ಐ ಮೀನ್  ರಚನಾನ ಇಲ್ಲೀವರೆಗೆ ಎಲ್ಲೂ ನೋಡೇ ಇಲ್ಲಾ.. ಆಕಾಶದ ಅಪ್ಸರೆನೋ ಅಲ್ವೋ ಗೊತ್ತಿಲ್ಲ ಆದರೆ
ಶಿ ಹ್ಯಾಸ್ ಬೀನ್ ಮೈ ಡ್ರೀಮ್ ಗರ್ಲ್ ನೌ...ಅವಳನ್ನ ಹುಡುಕಲೇಬೇಕು."

ರಾಮ್ ನ ಕಂಗಳಲ್ಲಿ ಕನಸಿನ ಬೆಟ್ಟವೇ ಇತ್ತು.
............
" ರಾಮ್ ಕನಸನ್ನ ಸೀರಿಯಸ್ ಆಗಿ ತಗೋಬೇಡ.  ರಾಜೇಶ್ ಅಂಕಲ್ ಹತ್ರ ಮಾತಾಡಿದೀನಿ
ಸಾಯಂಕಾಲ ಅವರನ್ನ ಮೀಟ್ ಮಾಡಿ ಬಾ". 

ಕಾಲೇಜಿಂದ ಮನೆಗೆ ಬಂದವನೇ ತಂದೆಯ ಬಳಿ ಕನಸಿನ ಹುಡುಗಿಯ ಬಗ್ಗೆ ಮಾತಾಡಿದ್ದಲ್ಲದೆ  ಎಮ್ ಎ ಸೈಕಾಲಜಿಯನ್ನ ಬೆಂಗಳೂರಲ್ಲಿ ಮಾಡುವುದಾಗಿ ತಿಳಿಸಿದ್ದ.. ಜೊತೆಗೆ ರಚನಾಳನ್ನು ಹುಡುಕುವುದನ್ನೂ ಕೂಡ

ಅವನ ತಂದೆ ತಾಯಿ ಇಬ್ಬರೂ ಕಂಗಾಲಾಗಿದ್ದರು.
ಅದರ ಪರಿಣಾಮವೇ ಹಿಪ್ನಾಸಿಸ್.
ರಾಜೇಶ್   ಸಮ್ಮೋಹಿನಿ ವಿಧಿ ವೈದ್ಯರು.

 ಅಂದೇ ಸಂಜೆ ಅವರ ಮುಂದೆ ಕೂತಿದ್ದ ರಾಮ್









Sunday, November 11, 2018

ಎಂಟನೇ ಆಯಾಮ.. ಯಾರವಳು ... ಎರಡನೇ ಅಧ್ಯಾಯ .

"ರಾಮ್ ಎದ್ದೇಳೋ ಏನಿದು  . ಕ್ಲಾಸ್ನಲ್ಲೇ ನಿದ್ದೆ ಮಾಡ್ತಿದೀಯ ?"
ಚರಣ್ ಬಡಿದೆಬ್ಬಿಸಿದಾಗಲಲೇ ರಾಮ್ ಗೆ ಎಚ್ಚರ.
"ರಾತ್ರಿ ಮನೇಲಿ ನಿದ್ಧೆ ಮಾಡಲ್ವೇನೋ... ಯಾವಾಗ ನೋಡಿದ್ರೂ ನಿದ್ದೆ ನಿದ್ದೆ"
"ದರಿದ್ರ ಕನಸುಗಳು. ಯಾರೋ ಹುಡುಗ ಇನ್ಯಾರೋ ಆಂಟಿ ಒಬ್ಬರ ಮುಖಾನೂ ಸರಿಯಾಗಿ ಕಾಣಲ್ಲ.. "
ರಾಮ್ ಪಿಸುಗುಟ್ಟಿದ.
"ನಿಂದೇ ಲಕ್ ಮಗ ಆಂಟಿ,  ಹುಡುಗಿ ಎಲ್ಲಾ ಕಾಣಿಸ್ತಾರೆ. ಏನ್ಮಾಡ್ತಾರೆ ನಿನ್ ಕನಸಲ್ಲಿ ಬಂದು."
"ಅದಾ...." ಅನ್ನುತ್ತಿದ್ದವ ಮೇಡಂ
" ವಾಟ್ಸ್ ಗೋಯಿಂಗ್ ಆನ್ ದೆರ್.."
ಅಂದಾಗ ಮಾತನಾಡದೆ ಸುಮ್ಮನಿರುವಂತೆ ಫ್ರೆಂಡ್ಗೆ ಸೂಚಿಸಿ ಕ್ಲಾಸ್ ಕೇಳಲಾರಂಭಿಸಿದ.
............
"
ಸುನಯನ, ಇವತ್ತಾದರೂ ನಾ ಹೇಳೋದು ನಂಬೇ. ನನಗೆ ವಿಚಿತ್ರ ಕನಸುಗಳು ಬೀಳ್ತಿವೆ." 
"ರಚ್ಚು ... ರಾತ್ರಿ ಹೊತ್ತು ಹಾರರ್ ಮೂವಿಸ್ ನೋಡ್ಬೇಡ ಅಂತ ಹೇಳಿದ್ರೆ ಕೇಳಲ್ಲ ನೀನು. ಈಗ ಅನುಭವಿಸು.."
" ಹಾರರ್ ಕನಸಲ್ಲ ಕಣೇ  ಒಬ್ಬ ಹುಡುಗ  ನನ್ ಹತ್ತಿರ ಬಂದು  ಯಾವಾಗಲೂ ನಿಮ್ಮಪ್ಪನ ಬಗ್ಗೆ ಮಾತಾಡಬೇಕು ಅಂತಾನೆ...  .. ಅಮ್ಮನ ಹತ್ರ ಹೇಗೆ ಹೇಳೋದು ಗೊತ್ತಾಗ್ತಿಲ್ಲ. ಜೊತೆಗೆ .....
ಮುತ್ತು ಕೊಡ್ತಾನೆ . ಕಣ್ಣು ಮುಚ್ಚಿದರೇ ಸಾಕು ಇದೇ ಥರ ಕನಸುಗಳು.. "
" ಸೂಪರ್ ಕಣೆ ಹುಡುಗ ಹೇಗಿದಾನೆ ? ಸ್ಮಾರ್ಟಾಗಿದಾನ? ಎಂಜಾಯ್ ಮಾಡೋದಲ್ವೇ?"
"ಜೋಕ್ ಮಾಡ್ಬೇಡ ಸುನಿ.. ಆ ಹುಡುಗ ಎಲ್ಲೋ ನೋಡಿರೋ ಹಾಗಿದೆ ಆದರೆ ನೆನಪಿಗೆ ಬರ್ತಿಲ್ಲ..."
"ಎಷ್ಟು ಸಲ ಈ ಥರ ಕನಸು ಬೀಳ್ತಿದೆ "

 "ಒಂದೊಂದು ಸಲ ಒಂದೊಂದು ಥರ ಕೋರ್ ಮಾತ್ರ ಇಷ್ಟೇ"
"ಹೋದವಾರ ನಾವು ಕೇರಳಕ್ಕೆ ಹೋಗಿದ್ವಲ್ಲ ಅಲ್ಲಿ ಕೂಡ..."
"ಹೇ ಸ್ಟಾಪ್ ಯಾವಾಗ ಯಾರ ಜೊತೆ ಹೋಗಿದ್ದೆ?"
" ನಾನು ನೀನು ಮತ್ತೆ .. ಉಷಾ ಮರೆತುಹೋಯ್ತಾ?"
" ಹಲೋ ಲೂಸಾ? ಹೋದವಾರ ಇಂಟರ್ನಲ್ ಇತ್ತು . ನೀನು ಎಲ್ಲಾ ದಿನಾನೂ ಇಲ್ಲೇ ಇದ್ದೆ ನಾವು ಕೂಡ.. ಸುಳ್ಳು ಹೇಳಬೇಕು ಆದರೆ ಇಷ್ಟೊಂದು ಅಲ್ಲ. ಕೇರಳಕ್ಕಿರಲಿ ಪಕ್ಕದ ಮೈಸೂರಿಗೇ ಮೂರೇ ಜನ ಹೋಗಿದ್ದಿಲ್ಲ ನಾವು..  "
" ಸುಳ್ಳು ಹೇಳತಿರೋದು ನೀನು ..... ನಾವು ಹೋಗಿದ್ವಿ .. ಬಸ್ ಸಿಗಲಿಲ್ಲ ಅಂತ ಕಾರ್ ಮಾಡಿಕೊಂಡು ಹೋಗಿದ್ದು... ದಾರೀಲಿ ಉಷಾಗೆ ಸುಸ್ತಾಗಿ ವಾಂತೀ ಮಾಡ್ಕೊಂಡಿದ್ದು.."
" ಅಮ್ಮ ತಾಯೀ ಊಹಾಲೋಕದ ರಾಣಿ.. ಬೊಗಳೆ ದಾಸಿ ..  ಲಾಸ್ಟ್ ವೀಕ್ ನಿನ್ ಅಟೆಂಡೆನ್ಸ್ ನೋಡ್ಕೊಂಡು ಬಾ .. ಈಗ ರೈಟ್ ಹೇಳು.."
ರಚಿತಾ ಪೂರ್ತಿ ದಿಗ್ಭ್ರಾಂತಳಾದಳು
.......
 " ಲೋ ರಾಮ್ ಏಳೋ ನಿನ್ನ ಮೊಬೈಲ್ ಅಲಾರಾಮ್ ಆಗಿನಿಂದ  ಕಿರಿಚ್ಕೋತಿದೆ.."
ಅಪ್ಪನ ದನಿಯಿಂದ ದಡಬಡಿಸಿ ಎದ್ದ
ಮತ್ತೆ ಕನಸುಗಳು...
ಸ್ನಾನ ಮಾಡುತ್ತಾ  ರಾತ್ರಿ  ಕಂಡ ಕನಸನ್ನ ನೆನೆಸಿಕೊಳ್ಳಲೆತ್ನಿಸಿದ..
ಇಬ್ಬರು ಹುಡುಗಿಯರು...
ಇಬ್ಬರ ಮುಖವೂ ಪರಿಚಿತ ಅನಿಸ್ತಿದೆ.
ಆದರೆ..
ಮತ್ತೆ ಏನೂ ನೆನಪಿಗೆ  ಬರುತಿಲ್ಲ.
ಹೋದರೆ  ಹೋಗಲಿ ಎಂದು ಶವರ್ ನತ್ತ ತಲೆ ಚಾಚಿದ...
ಹಿತವಾಗಿತ್ತು. ಹಾಗಿ ಕಣ್ಮುಚ್ಚಿದ.
ಏನೋ ಸದ್ದಾದಂತಾಗಿ ಕಣ್ತೆರೆದವನಿಗೆ 
ಬಿಸಿ ಹಬೆಗೆ  ಎದುರಿದ್ದ ಗಾಜಿನ ಬಾಗಿಲಲ್ಲಿ ಅಸ್ಪಷ್ಟ ಮುಖ ಅದೇ ಮುಖ ಕನಸಲ್ಲಿ ಕಂಡ ಮುಖ
ಅಮ್ಮಾ ಎಂದು ಕಿರುಚಿದ..
ಡಬಡಬ ಬಾಗಿಲ ಬಡಿತದ ಸದ್ದು.
ರಾಮ್ ಏನಾಯಿತು?  ಬಾಗಿಲು ತೆಗಿ.
ರಾಮ್ ಕಣ್ಣುಬಿಟ್ಟ ಶವರ್ ನೀರು ತಲೆ ಮೇಲೆ ಬೀಳುತ್ತಲೇ ಇದೆ...
ಅಂದರೆ ನಾನೀಗ ನೋಡಿದ್ದು ಭ್ರಮೆಯಾ? ಕನಸಾ?
ಗೊಂದಲದೊಡನೆಯೇ ಶವರ್ ಆಫ್ ಮಾಡಿ
"ಏನಿಲ್ಲಾಮ ಬಿಸಿನೀರು ಹಾಕೊಂಡೆ ಅಷ್ಟೇ"
ಎಂದು ನುಡಿದು ಟವಲ್ ಕೈಗಿತ್ತುಕೊಂಡ
ಆದರೂ 
ಮನದಲ್ಲಿ ಪ್ರಶ್ನೆಯೊಂದು ಮೂಡಿತು.
ಯಾರವಳು?


.....